సంక్షోభంలో దేశీయ విమానయాన రంగం

మన దేశంలో విమానయాన రంగం అనూహ్యంగా అభివృద్ధి పధం లో దూసుకెళ్తున్న వేళ విమానయాన సంస్థలు ధరలను సామాన్యుడికి అందుబాటులోనికి తేవాలని పోటీపడడం హర్షణీయం. కానీ ఈ పరుగులో ఒక్కప్పుడు మార్కెట్ లో 22.5 శాతం వాటాతో 195 రోజు వారి సర్వీసులు, 37 గమ్య స్థానాలతో ఒక్క వెలుగు వెలిగిన జెట్ ఎయిర్ వేస్ ప్రస్తుతం ఎనిమిది వేల కోట్ల ఋణ ఊబిలో చిక్కుకొని, ఋణదాతల చేతికి చిక్కి తీవ్రమైన కస్టాలను ఎదుర్కొంటొంది. మరొకపక్క 2005 నుండి ప్రారంభమైన స్పైస్ జెట్ దేశీయ విమాన యానంలో 13.6 వాటా కలిగి రెండవ పెద్ద విమానయాన సంస్థగా దూసుకుపోతొంది.

1993 నుండి మొదలైన జెట్ ఎయిర్ వేస్ ప్రస్థానం నాలుగు బోయింగ్ 737-300 విమానాలను లీజుకు తీసుకొని కార్యకలాపాలను ప్రారంభించి ఈ సంస్థ అంచెలంచలుగా ఎదిగి 2019 దాకా అంటే 27 సంవత్సరాలు ఒక్క ప్రమాదం కూడా లేకుండా ప్రజలను తమ తమ గమ్యాలకు చేరవేయడం లో సఫలీకృతమయ్యింది.2017 దాకా దేశం లో విమానయానం లో రెండవ స్థానం లో వున్న జెట్ ఎయిర్ వేస్ తాజాగా ఎనిమిది వేల కోట్ల ఋణభారం తో సంస్థ ఉద్యోగులకు జీతాలు కూడా చెల్లించలేని దుర్భర పరిస్థితిలో చతికిలపడిపోవడం సంస్థ విధానపరమైన లోపాలను ఎత్తిచూపిస్తోంది.ఇతర విమాన సంస్థలతో పోటిలో దీటుగా నిలబడడానికి విమానధరలను బాగా తగ్గించేయడం, నష్టాలను అంచనా వెయ్యడంలో ముందు చూపు లేకపోవడం, నిధులను వేరే సంస్థలకు బదలాయించడం వంటి తప్పిదాలతో సంస్థ పెనుఋణభార ఊబిలో కూరుకుపోయి ఏకం గా సంస్థ మూసివేయాల్సిన స్థితికి దిగజారిపోవడం స్వయంకృతాపరాధం.. కొన్ని బ్యాంకులు, అగ్రగామి ఫైనాన్స్ సంస్థలు ఆపన్న హస్తం అందించేందుకు ముందుకు వస్తాయని అనుకున్నా చివరి క్షణం లో ఆ ఆశ కూడా నీరుకారిపోవడంతో ఈ సంస్థ శాశ్వతంగా మూసివేయబడింది. స్పైస్ జెట్ సంస్థ కూడా తొలుత ఇటువంటి ప్రజాకర్షక పధకాలను ప్రవేశపెట్టి అప్పుల ఊబిలో కూరుకున్నాక, యజమాన్యం మార్పుతో కోలుకుంది. ఇండిగో సంస్థ కూడా నష్టాల తాకిడి ప్రారంభం అయ్యాక,యజమాన్యం సమయస్పూర్తితో వెంటనే కోలుకుంది. ఎయిర్ ఇండియా నష్టాలలో కొట్టుమిట్టాడుతునే వుంది. కేంద్ర ప్రభుత్వం తాజాగా ఈ సంస్థను అమ్మేయడానికి ప్రయత్నాలను ప్రారంభించింది.

తాజాగా మార్చి 23 నుండి దేశీయ విమానాలు, 25 వ తేదీ నుండి అంతర్జాతీయ విమాన సర్వీసులను తాత్కాలికంగా నిలిపివేయడం వలన విమాన రంగం మరిన్ని కష్టాలను మూటకట్టుకుంది. కష్టాలను భరించలేక విమాన యాన సంస్థలు తమ ఉద్యోగుల జీత భత్యాలలో 25 నుంండి 50 శాతం వరకు కోత విధించడం ఉద్యోగులకు గోరు చుట్టుపై రోకల్లి పోటు చందాన తయారయ్యింది. దేశీయ ప్రభుత్వ రంగ చమురు సంస్థలకు ఈ విమానయాన సంస్థలు వందల కోట్ల బకాయిలు పడ్డారని వార్తలు వస్తున్నాయి. మొత్తానికి దేశీయం గా విమానయాన రంగం తీవ్ర సంక్షోభంలో చిక్కుకుంది. ధరలకు విపరీతంగా రెక్కలొచ్చి ప్రయాణీకులకు ఊపిరి సలపడం లేదు. ప్రభుత్వం తక్షణం స్పందించి విధానపరనిర్ణయాలు, సంస్థాగత మార్పులతో దేశీయ విమాన రంగాన్ని గట్టెకించాల్సిన అవసరం ఎంతైనా వుంది